បណ្តុះបណ្តាលមន្ត្រីពន្ធនាគារការពារអ្នកទោស និងប្រឆាំងអំពើហិង្សា
បណ្តុះបណ្តាលមន្ត្រីពន្ធនាគារការពារអ្នកទោស និងប្រឆាំងអំពើហិង្សា
គណៈកម្មាធិការសិទ្ធិមនុស្សកម្ពុជា (CHRC) និងការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស (OHCHR) នឹងធ្វើការរួមគ្នាជាមួយក្រសួងមហាផ្ទៃ ដើម្បីលុបបំបាត់ការធ្វើទារុណកម្ម និងអំពើហិង្សានៅក្នុងមណ្ឌលអប់រំកែប្រែ និងពន្ធនាគារទាំងអស់នៅទូទាំងប្រទេស។
ទោះជាយ៉ាងនេះក្តី ក្រសួងមហាផ្ទៃបានមានប្រសាសន៍ថា ស្ថានការណ៍នៅក្នុងមណ្ឌល និងពន្ធនាគារទាំងនេះ មិនធ្ងន់ធ្ងរទេ ដោយសារស្ថានការណ៍កំពុងគ្រប់គ្រងដោយបង្កើតការយល់ដឹង និងអប់រំដល់អាជ្ញាធរក្នុងការមិនប្រើអំពើហិង្សា។
ការពិភាក្សាធ្វើឡើងនៅពេលដែលតំណាង OHCHR លោក Pradeep Wagle ក្នុងកិច្ចប្រជុំកាលពីម្សិលមិញបានស្នើសុំប្រធាន CHRC លោក កែវ រ៉េមី ឱ្យមានគោលនយោបាយមួយដើម្បីបញ្ឈប់អំពើហិង្សា និងការធ្វើទារុណកម្មនៅក្នុងពន្ធនាគារកម្ពុជា។
CHRC បានយល់ព្រមថាពួកគេនឹងរៀបចំសិក្ខាសាលាដើម្បីបណ្តុះបណ្តាលមន្ត្រីស្តីពីការការពារអ្នកទោសប្រឆាំងនឹងការធ្វើទារុណកម្មនៅក្នុងពន្ធនាគារ។
អនុប្រធាន CHRC លោក ជិន ម៉ាលីន មានប្រសាសន៍កាលពីម្សិលមិញថា OHCHR និងក្រសួងមហាផ្ទៃនឹងធ្វើការរួមគ្នាដើម្បីធានាថាអ្នកទោសនៅក្នុងមណ្ឌល និងពន្ធនាគារមិនត្រូវបានធ្វើទារុណកម្ម ហើយអំពើហិង្សាគ្រប់ទម្រង់នឹងត្រូវបានបញ្ឈប់។
លោកបានបន្ថែមថា៖ «យើងទាំងអស់គ្នានឹងមកជួបជុំគ្នាដើម្បីបើកថ្នាក់បណ្តុះបណ្តាល និងសិក្ខាសាលាសម្រាប់មន្ត្រីពាក់ព័ន្ធដើម្បីបង្រៀនពួកគេអំពីសិទ្ធិអ្នកទោស និងតម្រូវការដើម្បីបញ្ឈប់អំពើហិង្សា និងការធ្វើទារុណកម្មអ្នកទោស»។
កន្លងមក លោកថា មានទម្រង់នៃការធ្វើទារុណកម្មលើអ្នកទោសតាមមណ្ឌល និងពន្ធនាគារពីសំណាក់មន្ត្រី ប៉ុន្តែអ្នកដែលរកឃើញថាធ្វើបែបនេះ ត្រូវបានអាជ្ញាធរថ្នាក់លើបានពិន័យ។
លោកមានប្រសាសន៍បន្ថែមថា៖ «មន្ត្រីរូបនេះត្រូវបានតុលាការចោទប្រកាន់និងកាត់ទោស»។
ប្រទេសកម្ពុជាជាប្រទេសហត្ថលេខីនៃពិធីសារប្រឆាំងអំពើទារុណកម្មក្នុងឆ្នាំ២០០៧ ដែលតម្រូវឱ្យរដ្ឋាភិបាលបង្កើតប្រព័ន្ធឯករាជ្យមួយដើម្បីទប់ស្កាត់ការធ្វើទារុណកម្ម។
លោក ម៉ាលីន មានប្រសាសន៍ថា កម្ពុជាបាន និងកំពុងចាត់វិធានការរាល់សកម្មភាពទាំងអស់ ដើម្បីបញ្ឈប់អំពើហិង្សា និងការធ្វើទារុណកម្មនៅក្នុងមណ្ឌលអប់រំកែប្រែ និងពន្ធនាគារ ខណៈដែលព្រះរាជាណាចក្រកម្ពុជាប្រកាន់យ៉ាងខ្ជាប់ខ្ជួននូវពិធីសារប្រឆាំងការធ្វើទារុណកម្ម។
អ្នកនាំពាក្យអគ្គនាយកដ្ឋានពន្ធនាគារ លោកឧត្តមសេនីយ៍ឯក នុត សាវនា បានមានប្រសាសន៍កាលពីម្សិលមិញថា ក្រសួងបាននិងកំពុងយកចិត្តទុកដាក់យ៉ាងខ្លាំងលើបញ្ហានេះ ហើយកំពុងចាត់វិធានការទាំងអស់ដើម្បីធានាថាគ្មានអំពើហិង្សា និងការធ្វើទារុណកម្មលើអ្នកទោស។
លោកបានបន្ថែមថា៖ «កន្លងមក រដ្ឋមន្ត្រីក្រសួងមហាផ្ទៃ លោក ស ខេង បានបញ្ជាឲ្យគ្រប់រាជធានី-ខេត្ត រៀបចំប្រអប់បណ្តឹង ដើម្បីឲ្យប្រជាពលរដ្ឋដាក់ព័ត៌មានអំពីការធ្វើទារុណកម្ម ឬអំពើហិង្សាលើទណ្ឌិត ហើយប្រអប់ទាំងនេះត្រូវប្រមូលពីរដងក្នុងមួយខែ»។
លោកថា បើមានពាក្យបណ្ដឹងនឹងត្រូវស៊ើបអង្កេតឲ្យបានហ្មត់ចត់តាមនីតិវិធីច្បាប់រហូតដល់អ្នកដែលទទួលខុសត្រូវត្រូវបានផ្ដន្ទាទោសទៅតាមច្បាប់ រួមទាំងត្រូវដកចេញពីមុខតំណែង ពិន័យ ឬផ្ដន្ទាទោស៕
